Просім прыняць да разгляду заўвагі ў рамках грамадскага абмеркавання па архітэктурна-планіровачнай канцэпцыі па аб'екце «Рэканструкцыя цэнтральнага парку і добраўпарадкаванне прылеглай тэрыторыі г.п. Шуміліна»
1) Не ўдалося выявіць праект зон аховы Вайсковых могілак, якія размешчаны ў парку і з’яўляюцца гісторыка-культурнай каштоўнасцю (шыфр 213Д000844). Паводле Кодэкса аб культуры арт. 105 п. 6: Распрацоўка горадабудаўнiчай i землеўпарадкавальнай дакументацыi, а таксама iншай праектнай дакументацыi, рэалiзацыя якiх можа аказаць уздзеянне на нерухомыя матэрыяльныя гiсторыка-культурныя каштоўнасцi, без нанясення ўстаноўленых зон аховы нерухомых матэрыяльных гiсторыка-культурных каштоўнасцей або без iх устанаўлення забараняецца. Такім чынам распрацоўка праекта рэканструкцыі парку не можа весціся да афіцыйнага зацверджання ПЗА.
2) Цалкам нелагічна выглядае функцыянальнае заніраванне парку і прылеглай тэрыторыі. Цяпер у паўночнай частцы парку склалася экспазіцыйна-мемарыяльная зона, у праекце ж мяркуецца не толькі размясціць буйны шумны дзіцячы комплекс (які відавочна не стасуецца з мемарыяльнай функцыяй), але і адарваць ад мемарыяльнай зоны і краязнаўчага музея ваенную тэхніку і мемарыял воінам-інтэрнацыяналістам, стварыўшы ім асобную пляцоўку каля дзіцячай бібліятэкі.
Лагічным выглядае стварэнне паўнавартаснай дзіцячай зоны ў зялёнай зоне вакол дзяцячай бібліятэкі, а ў гарадскім парку пакінуць мемарыльна-культурную зону і зону ціхага адпачынку.
3) Цэнтрам ціхай зоны варта зрабіць штучны вадаём, размясціўшы там найбольш выразныя архітэктурныя формы: напрыклад, выгнутую пергалу, падпорныя сценкі з убудаванымі лаўкамі, каменныя скульптуры і арт-аб’екты (думаем, у райцэнты ёсць свае таленты, здольныя дапамагчы з гэтым). Дадаткова прапрацаваць архітэктуру малых формаў, каб яна выглядала сучасна, то бок без каваных вензеляў, празрыстага пластыку і імітацыі ляпніны.
4) Праезд да паркоўкі пад нумара 18 выканаць з дробнаштучнай пліткі, каб не складвалася адчуванне перавагі аўтамабіляў у зоне адпачынку. Не выкарыстоўваць пешаходных пераход — сумніўна, што на выездзе з гэтай паркоўкі такі насычаны трафік, што ён патрэбны. Або пусціць праезд узроўж фасадаў дамоў, каб ён не рассякаў парк на часткі.
5) Ліквідаваць абсалютна неадэкватную паркоўку па нумарам 6. Яна празмерна шырокая і каля дома № 11 (і абсалютна незапатрабаваная, мяркуючы па спадарожнікавых здымках), варта яе звузіць да шырыні 2,5-3 м для паралельнага размяшчэння парковачных месцаў, на вызваленай паласе можна высадзіць дадатковы рад дрэваў. Насупраць райвыканкама паркоўка зусім выходзіць па-за межы разумнага. Па-першае, яна разрывае пешаходную сувяць па вул. Кароткіна. Людзі ідзуць па тратуары ўздоўж дом № 5 ці 11, потым ён раптам сканчаецца і пачынаецца праезная частка. Пешаходу ці то трэба парушаць правілы дарожнага руху, ці то пераходзіць на іншы бок. Па-другое, памеры паркоўкі проста касмічныя для маленькага горада, адчуванне, што яе праектавалі пад размяшчэнне фур! Пешаходны пераход перад помнікам Леніну мае даўжыню 28 м, для прыкладу, столькі ж мае пешаходны пераход праз праспект Незалежнасці, галоўную вуліцу 2-мільённага горада Мінска! Для каго гэты пляц з асфальту? Неабходна ўключыць яго граніцу работ і перапланаваць.
6) У азеляненні парку варта звярнуць увагу на папулярныя ў сучасным ландшафтным дызайне дэкаратыўныя злакі, мнагалетнія кусты і кусцікі, у тым ліку з каляровым лісцем ці сцяблом, якія круглы год выглядаюць эстэстычна, у адрозненне ад адналетнікаў, якія радуюць толькі летам і патрабуюць штогадовых выдаткаў.
7) Планіроўку парку вызначаюць так шмат фактаў, што дзіўна бачыць рэгулярныя канцэнтрычныя кругі ў якасці асновы планіровачнай кампазіцыі. Больш пасавала б (для тэрыторыі па-за мемарыяламі) нерэгулярная, жывапісная планіроўка — яна б дазволіла, напраклад, сэканоміць плітку, выкладваючы яе там, дзе яна патрэбная, а не там, дзе дыктуе геаметрычная форма, выбраная за аснову.
8) Можна было б падкрэсліць уваходную пляцоўку ў парк (пазіцыя 12) помнікам якому-небудзь выдатнаму дзеячу беларускай гісторыі ці культуры, звязанаму з Шуміліншчынай. Напрыклад, дагэтуль ніяк не ўшанава постаць уражэнца Казьянаў Дзмітрыя Іванавіча Даўгялы (1868-1942?), беларускага гісторык і класіка айчыннай археаграфіі.
Количество подписей под петицией:
38
Грамадскае абмеркаванне праводзілася райвыканкамам з 5 лютага 2021 г. па 1 сакавіка 2021 г. уключна.
Паведамленне аб Грамадскім абмеркаванні размешчана 26 студзеня 2021 г. на афіцыйным інтэрнэт-сайце райвыканкама (http://www.shumilino.vitebsk-region.gov.by) у раздзеле “Грамадскія абмеркаванні”, доступ на які ажыццяўляецца з галоўнай старонкі названага сайта. Таксама паведамленне аб Грамадскім абмеркаванні апублікавана 26 студзеня 2021 г. у раённай газеце “Герой працы”.
У паведамленні аб Грамадскім абмеркаванні было паказана, што заўвагі і (або) прапановы ўдзельнікаў Грамадскага абмеркавання прымаюцца з 5 лютага 2021 г. па 1 сакавіка 2021 г. уключна ў пісьмовай форме альбо па электроннай пошце па адрасах: Шумілінскі раённы выканаўчы камітэт, г.п. Шуміліна, вул. Кароткіна, 10, e-mail: [email protected]
Улічваючы тое, што Ваш зварот Віцебскім абласным выканаўчым камітэтам быў накіраваны ў райвыканкам 9 сакавіка 2021 г. разгледзіць заўвагі і прапановы ў рамках Грамадскага абмеркавання ва ўстаноўленыя тэрміны не з’яўляецца магчымым.
Дадаткова па заўвагах, пазначаных у звароце, павядамляем наступнае.
1. Воінскія могілкі занесены ў Дзяржаўны спіс гісторыка-культурных каштоўнасцей Рэспублікі Беларусь (далей – РБ) №213Д000844, катэгорыя 3 (пастанова Савета Міністраў РБ ад 14.05.2007 г. №578).
Мяжа дадзенага пахавання пазначаецца праз агароджы і супадае з ахоўнай зонай згодна пашпарта №2303 вайсковага пахавання.
Ахоўная зона пахавання складае: даўжыня-20 метраў, шырыня-20 метраў.
Паводле ліста Міністэрства культуры РБ ад 24.11.2020г №04-09 / 1513 / н дазвол на выкананне праектных работ на дадзеным аб'екце не патрабуецца.
Праектам “Рэканструкцыя цэнтральнага парку і добраўпарадкаванне прылеглай тэрыторыі г.п. Шуміліна” работы па добраўпарадкаванні ў межах ахоўнай зоны пахавання не прадугледжваюцца.
2. Размяшчэнне паўнавартаснай дзіцячай зоны са спартыўнымі і гульнявымі пляцоўкамі для дзяцей розных узростаў у зялёнай зоне каля цэнтральный раённай бібліятэкі не ўяўляецца магчымым з прычыны недастатковай плошчы дадзенага ўчастка.
Пляцоўка для ваеннай тэхнікі выносіцца на тэрыторыю каля цэнтральный раённай бібліятэкі з-за планаванага паступлення дадатковай ваеннай тэхнікі ад Міністэрства абароны РБ. Размяшчэнне яе ў мемарыяльнай зоне не ўяўляецца магчымым з-за адсутнасці свабодных плошчаў і неабходнасці захавання зялёных насаджэнняў. Асобная пляцоўка спрыяе агляду ваеннай тэхнікі з усіх бакоў.
Вольны час дзяцей сярэдніх і старэйшых узростаў праводзіцца разам з дарослымі ў зоне масавых мерапрыемстваў і фізкультурна-аздараўленчых заняткаў. Адпаведна дзіцячую зону мэтазгодна размяшчаць паміж зонамі актыўнага і пасіўнага адпачынку. Дзеці ранняга ўзросту, прывезеныя бацькамі ў калясках, маюць патрэбу ў сне, які зручны ў зоне ціхага адпачынку і прагулак.
Таксама, дзіцячая зона парку актыўна выкарыстоўваецца навучэнцамі школы, размешчанай побач з тэрыторыяй парку, для правядзення заняткаў па фізічнай культуры.
3. Размяшчэнне ціхай зоны вакол вадаёма не плануецца ў сувязі з вышэйпададзеным функцыянальным занаваннем.
4. Праезд да паркоўкі пад нумарам 18 з'яўляецца існуючым і вядзе да дзяржаўнай установы "Фізкультурна-аздараўленчы цэнтр Шумілінскага раёна". Будаўнічыя работы выкананы ў 2017 г. з пакрыццём з асфальтабетону. Змяненне існуючага пакрыцця праезду з'яўляецца эканамічна немэтазгодным. Пешаходны пераход прадугледжаны ў адпаведнасці з патрабаваннем аддзела ДАІ Шумілінскага РАУС і Тэхнічнага кодэкса ўсталяванай практыкі 45-3.03-227-2010 “Вуліцы населенных пунктаў. Будаўнічыя нормы праектавання”.
5. Паркоўка пад нумарам 6 з'яўляецца існуючай. Памеры паркоўкі адпавядаюць разліковым нормам па колькасці машынамесцаў для бліжэйшых будынкаў. Таксама, паркоўка выкарыстоўваецца для правядзення культурна-масавых мерапрыемстваў у горадзе з перакрыццем дарожнага руху па вуліцы Кароткіна.
6. Відавы склад зялёных насаджэнняў у ландшафтным дызайне парку запраектаваны з улікам мясцовых умоў.
7. Аб'яднаўчым прасторам для дзіцячага адпачынку і гульняў з'яўляецца невялікая цэнтральная плошча са скульптурай, якая можа выкарыстоўвацца для арганізацыі гульняў і правядзення дзіцячых святаў. Для забеспячэння роўнааддаленага доступу ад гульнявых пляцовак да цэнтра дзіцячай зоны выбрана радыяльная схема пешаходных дарог, якая забяспечвае максімальны агляд дзіцячых пляцовак.
8. Падкрэсліць уваходную пляцоўку ў парк (пазіцыя 12) помнікам заслужанаму дзеячу беларускай гісторыі ці культуры, звязанаму з Шуміліншчынай, не ўяўляецца магчымым у сувязі з тым, што з уваходу ў дзіцячую зону (пазіцыя 12) адкрываецца від на кампазіцыйную дамінанту парка - скульптуру «Буслы», у зімовы час - на навагоднюю елку. Размяшчэнне дадатковага помніка прывядзе да нагрувашчвання.
52кБ, добавлено , 2021-03-29 13:16:52
Комментарии (0)
Для просмотра комментариев Вы должны войти на сайт или зарегистрироваться