Звяртаем вашу ўвагу на той факт, што работы па рэканструкцыі аб’ёма блока грамадска-бытавога абслугоўвання дома па праспекце Незалежнасці, 155/1 адбываюцца з парушэннем заканадаўства. Так значна змяняецца каларыстычнае рашэнне фасадаў, дадаюцца неўласцівыя цёмныя колеры, а таксама беспадстаўна замалёўваюцца залацістыя мазаічныя ўстаўкі, выкананыя з той жа смальты, што і вядомыя мазаікі на тарцах вышынных жылых дамоў, да якіх прымыкаюць гэты і іншы блокі грамадска-бытавога абслугоўвання. Гэтыя дамы фарміравалі парадны ўезд у сталіцу БССР з боку Масквы і з’яўляюцца выдатным прыкладам ансамблевай савецкай жылой забудовы канца 1970-х гг. На тарцах гэтых дамоў Аляксандрам Кішчанкам у 1977–1978 гг. выкананы чатыры мазаікі ”Горад мастацтва“, ”Горад-будаўнік“, ”Горад навукі“, ”Горад-воін“, якія з'яўляюцца нерухомымі гісторыка-культурнымі каштоўнасцямі рэспубліканскага значэння (шыфр 712Ж000205).

Нагадваем, што паводле артыкула 105 Кодэкса аб культуры:

1. Для забеспячэння захавання нерухомых матэрыяльных гiсторыка-культурных каштоўнасцей i навакольнага асяроддзя ў пэўных межах устанаўлiваюцца межы тэрыторый нерухомых матэрыяльных гiсторыка-культурных каштоўнасцей.

6. Распрацоўка горадабудаўнiчай i землеўпарадкавальнай дакументацыi, а таксама iншай праектнай дакументацыi, рэалiзацыя якiх можа аказаць уздзеянне на нерухомыя матэрыяльныя гiсторыка-культурныя каштоўнасцi, без нанясення ўстаноўленых зон аховы нерухомых матэрыяльных гiсторыка-культурных каштоўнасцей або без iх устанаўлення забараняецца.

Паколькі на сайце Нацыянальнага фонда тэхнічных нарматыўных прававых актаў (https://tnpa.by/) адсутнічае праект зон аховы для мазаік у жылым раёне Усход, можна сцвярджаць, што праведзеныя фасадныя работы парушаюць палажэнні Кодэкса аб культуры.

Для нейтралізацыі негатыўнага ўздзеяння на гісторыка-культурную каштоўнасць просім абавязаць заказчыка аднавіць першапачатковы выгляд фасада (у тым ліку ачысціць смальту ад фарбы) да афіцыйнага зацвярджэння праекта зон аховы мазаік, і не прымаць аб’ект у эксплуатацыю да выканання гэта патрабавання.