Прапануем усталяваць у Гродне гарадскую скульптуру ці мемарыяльную шыльду для ўшанавання памяцi Боны Сфорцы. Мяркуем, што наяўнасці яскравай гераіні падкрэслівала б прыналежнасць Гродна геаграфічна і культурна да еўрапейскага кантэксту.

Бона Сфорца (1494-1557) - міланская прынцэса, з магутнага роду герцагаў Сфорца, каралева польская і вялікая княгіня літоўская, другая жонка Жыгiмонта Старога.

Яна зрабіла важны ўнёсак у развіццё горада Гродна. Пры ёй праводзіліся працы па брукаванні вуліц, уладкаванню гарадскіх водных сістэм, у прыватнасці ачыстка калодзежа на цэнтральнай плошчы, рамантаваўся галоўны каталіцкі храм горада, так званая Фара Вітаўта.
Паводле прывілея каралевы Гродна атрымаў герб. Мяркуецца, што гэта быў менавіта герб з аленем Святога Губерта, якiм горад карыстаецца ў сучаснасці.
Бона загадала ўзяць на службу гадзіннікавых спраў майстра для абслугоўвання механізму гарадзенскага ратушнага гадзінніка - найважнейшага механізму сярэднявечнага горада.
Важным укладам Боны ў развіццё Гродна з'яўляюцца пабудаваныя па яе жаданню драўляны замак у раёне Гарадніцы і касцёл Святога Духа з кляштарам. Будынкі апошніх захаваліся ў перабудаваным выглядзе. Гэты комплекс выконваў ролю гарадскога прытулку і бальніцы для жабракоў. Яго заснаванне безумоўна было праявай гуманізму і значным укладам у развіццё медыцыны горада.

Грунтуючыся на вышэйпрыведзеных звестках, лічым, што памяць каралевы і вялікай княгіні Боны Сфорца павінна быць ушанавана ў горадзе Гродна. Гэта можа быць гарадская скульптура ў поўны рост (кшталту Гараджаніна каля тэатра лялек ці Дойліца у Швейцарскай даліне) на адной з цэнтральных вуліц паблізу Савецкай плошчы, альбо памятная шыльда. Яна можа быць усталявана на будынку былога манастыра Святога Духа (Савецкая 14), пабудаванага паводле прывілея каралевы Боны.